Zgjedhja e presidentit të ri, komoditeti i Ramës nga votat e sigurta të deputetëve të PS dhe përçarja e frikshme e opozitës. A do të jetë një president i bindur ndaj qeverisë? Kjo dilemë do marrë fund me gjasë në raundin e katërt dhe të fundit për zgjedhjen e kreut të ri të shtetit. Mbi zhvillimet politike në vend dhe identikitin e presidentit të ri, komentojnë për gazetën “Fjala”, analistët Plator Nesturi, Leonard Karaj dhe Erald Shulla.
Nga Fernada Cenko
Ndërsa presidenti aktual, Ilir Meta, numëron ditës së prapthi, deri më 24 korrik, kryeministri Edi Rama e ka në kokë identikitin, por edhe emrin e presidentes apo presidentit të ri. Çështja është si do që të kalojë një “valë konsultimesh” me përfaqësuesit e opozitës. Më komod se kurrë, Rama ka gjitçka në duar. Së pari janë votat e nevojshme që PS ta zgjedhë vetë kreun e shtetit dhe e dyta gjendet përballë një opozite të përçarë në katërsh. Një pjesë e opozitës eshte me “lobin Berisha”, një pjesë tjetër shpresojnë se janë me “lobin Basha” (që për prestigj vetëquhen të tillë), disa sjanë me asnjë, duke tentuar të bëjnë grupimin e vet dhe pjesa e katërt që as vetë nuk e dinë se me kë janë.
Kjo situatë Ramën më shumë e argëton sesa e detyron që të bëjë kompromise që mund të jenë paksa të dhimbshme. Për herë të parë në nëntë vite qeverisje, kryeministri nuk do të duhet të luftojë edhe me kreun e shtetit, paçka se shumë mendojnë se ky është një lloj argëtimi dhe sport i dashur i kreut të qeverisë. Rama tashmë e ka të qartë se për të qenë i qetë në qeverisje, pa asnjë pengesë institucionale, duhet të zgjedhë një president që të mos i ngjajë aspak Metës, dikur mik, më pas armik, sërish mik e së fundmi po armik. Në lojë është emri i kreut të shtetit që Kushtetuta e vitit 2008 me marrëveshjen Berisha-Rama ia ka prerë keqas kompetencat, por gjithsesi edhe në anën honorifike, presidenti përfaqëson unitetin dhe majën e hirarkisë shtetërore.
A do jetë një president i bindur i kryeministrit? Po dhe jo. Do jetë i bindur sepse do zgjidhet vetëm me vendimin e Ramës, por mund të mos jetë i bindur vetëm atëherë kur Ramës i duhet (i/e pabinduri president), për të krijuar imazhin se pushtetet janë të ndara dhe kryeministri i respekton institucionet. Fundi duket se ka një parashkrim, të paktën me situatën e deritanishme. Deputetët e PS-së të gjithë në rresht, por edhe të tjerë që mund ti bashkohen këtij rreshti do duartrokasin emrin e ri të presidentit, duke menduar që në sallën e Parlamentit për veshjen që do kenë në pasarelën presidenciale siç e do protokolli. Mbi zhvillimet politike në vend dhe çështjen e zgjedhjes së presidentit të ri komentojnë për gazetën Fjala, analistët Plator Nesturi, Leonard Karaj dhe Erald Shulla.
Plator Nesturi: Kriteri i ri për president: duhet të jetë i dekoruar nga Meta
Leonard Karaj: “Tallava alla Rama”, president do të jetë një kukull e kryeministrit
Erald Shulla: Rama nuk do një president“vartës”, por as t’i krijojë konflikt
