Një 22-vjeçar është shoqëruar dhe proceduar penalisht pasi dhunoi me grushte infermierin e Spitalit në Berat.
Nga të dhënat paraprake bëhet me dije se shtetasi me inicialet K.Sh. u procedua për “Goditje për shkak të detyrës”.
Sakaq, po në Berat është goditur një tjetër rast të paligjshmërisë në fushën e lojërave të fatit, teksa një individ që vinte baste sportive nëpërmjet celularit në një lokal, u procedua penalisht.
Njoftimi i policisë:
Goditet 1 rast i paligjshmërisë në fushën e lojërave të fatit.
-Vinte baste sportive nëpërmjet celularit, në një lokal, procedohet penalisht 1 shtetas.
Procedohet penalisht 1 shtetas tjetër, pasi ditën e djeshme u shpall në kërkim për veprën penale “Goditje për shkak të detyrës”, kryer në bashkëpunim.
Shërbimet e Komisariatit të Policisë Berat, në vijim të operacionit policor të koduar “Lojtari”, për goditjen e organizimit të kundërligjshëm të lojërave të fatit, kanë vijuar kontrollet në ambiente të ndryshme të qytetit të Beratit, ku dyshohet se mund të kryhen këto paligjshmëri, dhe si rezultat, në lagjen “Donika Kastrioti, kanë goditur 1 rast të lojërave të fatit, online.
Si rezultat kanë referuar materialet në Prokurori ku nisi procedimi në gjendje të lirë për shtetasin Sh.Y., 62 vjeç, banues në Berat, pasi u konstatua në ambientet e një lokali duke vënë baste sportive me celular, i cili u sekuestrua në cilësinë e provës materiale.
Gjithashtu në vijim të veprimeve hetimore dhe një pune të mirë organizuar nga shërbimet e Policisë Berat, u kap dhe u procedua penalisht për veprën penale “Goditje për shkak të detyrës”, kryer në bashkëpunim, shtetasi i shpallur në kërkim ditën e djeshme K.Sh., 22 vjeç, pasi në ambjentet e Spitalit Rajonal Berat, në bashkëpunim me shtetasin E.N., goditën me grushta infermierin e Spitalit.
Materialet procedurale i kaluan Prokurorisë pranë Gjykatës së Shkallës së Parë Berat, për veprime të mëtejshme.
