Sali Berisha tha është penduar për mbështetjen që i ka dhënë më parë Lulzim Bashës dhe Enkelejd Alibeajt duke i cilësuar përsëri si “pengje”.
“Ska diskutim që ata faktojnë që nuk kanë merituar asnjë mbështetje pasi ata shkelmojnë mbi veten e tyre dhe sillen si pengje pa asnjë lloj vlere. Binomi Basha Alibasha përbën shëmtirën më të madhe të historisë politike të Shqipërisë, pengje të Edi Ramës dhe çdo votë e imagjinuar për ata është votë për Edi Ramën,” tha ai.
Kryetari i Rithemelimit u tregua optimist për zgjedhjet e 14 majit. Sipas tij Partia Demokratike do të dalë fitimtare në zgjedhjet vendore.
“14 maji do të jetë përsëri triumfi i idealeve të lirisë. PD është e sigurtë që në këto zgjedhje do dalë fitimtare dhe askush nuk e ndalon hovin e saj per ti rikthyer shqiptarëve voton e lirë,” tha ai.
Ndërkohë nuk munguan as akuzat ndaj kryeministrit Rama.
“Ne sot i nderojmë martirët e votës së lirë pas 32 vitesh, por mjerisht i nderojmë në kushtet e një monizmi të plotë. I nderojmë në kushte të njëjta me ato që ekzistonin ditën që ata ranë për t’u bërë të pavdekshëm. Sot të gjitha pushtetet janë në dorën e një njeriu. Të gjitha liritë dhe të drejtat e qytetarëve të Shqipërisë janë në duart e një njeriu, i cili kontrollon çdo pushte dhe vendos për çdo votë,” tha ai.
Nga Shkodra, Sali Berisha përkujtoi 4 viktimat të cilët humbën jetën në masakrën e 2 prillit të vitit 1991. Gjatë një proteste të demokratëve kundër rezultatit të zgjedhjeve të 31 marsit, plumbat e forcave të policisë morën jetën e Bujar Bishanakut, Arben Brocit, Nazmi Kryeziut dhe Besnik Cekës, sot të shpallur martirë të demokracisë, ndërkohë që me dhjetëra u plagosën.
