Në emisionin “Real Stoy”, ministri i Ekonomisë dhe Financave, Ervin Mete foli për reformën për pensionet si edhe për skemën dhe mënyrën se si do të tatohen profesionet e lira.
Gjatë kësaj interviste ai u shpreh se 10 vitet e fundit fondi për pensionet është dyfishuar, duke theksuar se është e domosdoshme një reformë për pensionet.
“Kemi ndjeshmëri ndaj kësaj shtresë. Por 10 vitet e fundit fondi për pensionet është dyfishuar dhe numri i pensionistëve është rritur me 25 %. Kemi kaluar si vend një sërë periudhash ku herë kanë pasur kontribute e herë jo. Kanë dalë në pension persona që kanë kontribuar dhe kanë dalë me paga më të larta. Punonjësit që do të dalin në vijim me paga më të larta do të kenë edhe pensione më të larta. Por a ka ardhur momenti për të bërë një analizë të thelluar të një reforme të dytë, apo të një analize të dytë. Pensioni do të varet nga kontribuuesit që do të jenë kur do të dalim në pension. Ka një shtyllë të dytë, ku secili kontribuon në llogarinë e vet, ne kemi hapur një diskutim të thelluar edhe me Bankën Botërore dhe me FMN, por duhet të kemi parasysh që ky diskutim të përfshijë edhe shtresa që kanë mbështetje nga buxheti i shtetit. Kemi mbi 60 mijë familje me ndihmë ekonomike, apo ish-të përndjekur që mbështeten nga buxheti i shtetit. Rreth 2.5 miliardë do të shkojnë për këto kategori që përmenda. Në stadin ku jemi përqindja e buxhetit nuk është jo domethënëse. Duke qenë se kemi këtë sistem që pagesat që marrin pensionistët përballohen nga ju dhe unë, do të duhet të kemi më shumë kontribuues në mënyrë që të rriten pensionet”, tha ministri Mete.
Opozita thotë që profesionistët e lirë po i taksoni më shumë se gjithë të tjerët?
Ministri Mete: Profesionet e lirë do të kenë një skemë për fitim dhe jo përfitim.Profesionistët e lirë do të kenë një skemë të tillë; Nga një lek deri në 140 mijë dollarë në vit do të tatohen 15 %, por fitimi dhe jo xhiro. Është e përllogaritur si taksa efektive që paguajmë ne si të punësuar që arrijmë nivelin 23 %. Taksa efektive llogaritet e përafërt me këtë nivel. Ne taksohemi për punën duke qenë se kemi të punësuar dhe vetëpunësuar. Një nga pikat që ka evidentuar FMN si dobësi e skemës së pensioneve, në momentin që janë të vetëpunësuar dhe nuk kontribuojnë, ndikon në mundësinë për të rritur pensionet nesër. Pra sa më i lartë të jetë raporti kontribut përfitues, duke mirë administruar kontributet do të jetë mundësia në të ardhmen që të ketë edhe një reformë./e.t
