Shqiptarëve që banojnë jashtë vendi u është kërkuar të regjistrohen. Pa qenë e nevojshme të kthehen në atdhe, të gjithë procedurën e identifikimit përmes adresave të sakta mund ta kryejnë në portalin e-Albania.
Ministrja për Europën dhe Punët e Jashtme, Olta Xhaçka bën të ditur se, për të gjithë shtetasit shqiptarë që ndodhen jashtë territorit të Republikës së Shqipërisë, saktësimi i adresës tashmë mund të bëhet online përmes platformës e-Albania, pa patur nevojën për t’u paraqitur pranë zyrave të Gjendjes Civile.
Kjo kërkesë e Ministrisë për Evropën dhe Punët e Jashtme përveç domosdoshmërisë së institucionit për të zotëruar të dhëna të sakta të numrit të shqiptarëve që jetojnë jashtë vendit, i shërben edhe një tjetër procesi, atij të mundësimit të votës së emigrantëve në zgjedhjet e 25 Prillit.
Pa saktësimin e adresave, emigrantët nuk do të mund të ushtrojnë vullnetin politik, gjithnjë nëse ata dëshirojnë që të votojnë nga aty ku banojnë. Deri më tani mundësimi i votës së emigrantëve është ende pezull. Prej 9 Janarit ky proces vazhdon të jetë në konsultim.
Megjithatë Komisioni Rregullator, ende nuk është mbledhur për të përcaktuar përfundimisht sesi do të votojnë emigrantët. KQZ është deklaruar se do të ngrejë një sistem ku do të regjistrohen të gjitha kërkesat për të votuar të shtetasve shqiptarë që jetojnë jashtë vendit, pasi ata të kenë deklaruar vendbanimet e sakta.
