Gazetarët Armand Shkullaku dhe Andi Bejtja janë të mendimit se Ilir Meta duhet të dorëhiqet nga posti i Presidentit pasi nuk e frenon dot, sipas tyre, kapjen e shtetit nga mazhoranca e kryeministrit Edi Rama.
“Ilir Meta nuk e frenon dot mazhorancën duke qëndruar në Presidencë. Nuk e di a frenon dot duke e dorëhequr, por duke qëndruar e di që nuk e frenon dot”, u shpreh Shkullaku në emisionin “Opinion” në Tv Klan.
“Kur janë këto shkelje, Presidentit nuk i mbetet gjë vetëm të bëhet revolucionar. Edhe të nxjerr dekret, ata nuk e njohin. Unë mendoj se presidenti nuk ka rrugë tjetër, vetëm të bëhet revolucionari. Të isha Ilir Meta unë do kisha ikur me kohë, që kur nuk iu botua dekreti në Fletoren Zyrtare”, tha Bejtja.
Ndërsa analisti Preç Zogaj kërkon nga Meta që të sillet në mënyrë institucionale përsa kohë është në zyrën e kreut të shtetit.
“Unë them që Presidenti për deri sa vazhdon të jetë President ai ka për detyrë të jetë institucional. Të respektojë funksionon e tij. Nuk mund të bëjë akte anti-kushtetuese në mbrojte të Kushtetues se kjo është një kontradiktë e madhe. Është një situatë e rëndë, jemi në përshkallëzim të një konflikti që jemi në kilometrat e fundit dhe nuk dihet se çfarë do ndodh”, tha Zogaj.
Presidenti Ilir Meta ka njoftuar një protest më 2 mars, në bulevardin kryesor të Tiranës, ku do të firmosë edhe një dekret, por pa dhënë më shumë detaje.
