Kryeministri Edi Rama në një komunikim me qytetarët në Facebook ka theksuar se njerëzit të duhet të jenë të vetëdijshëm se koronavirusi do të përhapet.
Për këtë arsye ai kërkon që qytetarët të jenë të kujdesshëm edhe pse sipas tij, 80 për qind e atyre që do të preken nuk do ta dinë kurrë se kanë pasur koronavirus.
“Ky grip i pazakonshëm nuk ndalet të shkojë kudo, por ndryshe nga çdo grip i zakonshëm që kalon pa trauma kombëtare e botërore luftohet me masa shtrënguese që përshkallëzohen deri në forma drastike siç mbrohen qytetaret civile nga bombardimet ne lufte. Duke e marrë lehtë shkon me këmbët e tua drejt një katastrofe kombëtare, kurse duke zbatuar rregullat shkon me sytë katër e me të gjitha armët e mundshme në luftë duke përshkallëzuar masa të forta deri në ekstrem“, tha Rama në një komunikim me qytetarët.
Ai renditi tre pikat, të cilat sipas Ramës duhet të merren parasysh nga të gjithë në rastin e koronavirusit.
“Sukses në këtë luftë quajmë: Së pari, ta ngulisim mirë në kokë është grip i pazakonshëm që do përhapet, por 80 % e atyre që do preken as do e marrin kurrë vesh që janë prekur se s’do kenë asnjë shenjë e do e ngordhin si çdo trup i shëndetshëm.
Së dyti vetëm 20 % të tjerë do kenë shenja të ndryshme por 80% e tyre do e kalojë njësoj si një grip i zakonshëm duke ndenjur në shtëpi, për këta këshillohet izolim brenda e mbajtja lart e të moshuarve e nuk bëhet shtrim në spital.
Së treti, vetëm 20% e atij 20% që ka shenja rezultojnë pozitiv me shenja shqetësuese e në shumicën dërrmuese janë mbi 60 vjeç e janë të sëmurë kronikë, ndaj për ta vetëm duhet regjimi spitalor.
Ngadalësimi i përhapjes përmes masave shtrënguese krijon dy avantazhe të mëdha: Zvogëlon mundësinë që numri i atyre që kanë nevoje të jetë më i madh se kapacitetet e sistemit shëndetësor që shkaktoi në Lombardi kolaps, e i jep kohë shkencës të gjejë kurën e duhur”.
