Presidenti i Republikës Bajram Begaj ka përmbyllur takimin e parë zyrtar jashtë vendit në Kosovë.
Në një intervistë për RTK, Begaj foli mes të tjerash edhe në lidhje me propozimin e bërë nga homologia Vjosa Osmani për krijimin e një Traktati të Mbrojtjes mes Shqipërisë dhe Kosovës.
Begaj tha se një iniciativë e tillë duhet të trajtohet me shumë kujdes nga institucionet e dy vendeve. Ai shtoi se janë Kuvendet respektive të dy vendeve që duhet të vendosin për një marrëveshje të tillë.
“Traktati i Mbrojtjes është një ide e hedhur nga presidentja e Kosovës e cila nënkupton një ide fillestare, e cila duhet të trajtohet me shumë kujdes nga institucionet ligjzbatuese dhe ligjvënëse, përkatësisht Kuvendet respektive. Unë e mirëkuptoj presidenten Osmani dhe do të punoj intensivisht bazuar te dritarja ligjore që ne na mbulon të ecim përpara me mundësinë e arritjes së një gjëje të tillë. Unë mendoj se Kuvendet respektive janë ato që do të vendosin për një marrëveshje të tillë.”, tha Begaj.
Begaj ka komentuar edhe mosliberalizimin e Kosovës, për të cilën thotë se është e vonuar. Sipas tij, kjo është një e drejtë që u është mohuar qytetarëve të Kosovës. Ai foli mes të tjerash edhe mbi tensionet në veri të Kosovës, të nxitura nga marrëveshja për targat.
“Situata e krizës së 31 korrikut ishte vërtetë serioze e dua të falenderoj Kosovën dhe politikanët për zgjidhje n e konfliktit me maturi e mirëkuptim, vetëm bisedimet janë garant i sigurisë së Kosovës.me mbështetjen e aleatëve strategjikë BE-SHBA do të sigurojmë që sovraniteti dhe integriteti territorial dhe statusi i pavarur të mos ndryshojë. Për këtë ka mbështetjen e plotë të Shqipërisë”, tha Begaj.
