Rezultatet e analizës së ADN-së të kockave të gjetura në makinën e djegur në Pukë, mund të hedhë dritë mbi fatin e biznesmenit italian i cili rezulton i zhdukur që prej datës 6 janar në vendin tonë. Përveç hetimeve që po zhvillohen në Shqipëri, mediat fqinje shkruajnë se për zhdukjen e 45-vjeçarit, hetime ka hapur edhe Prokuroria e Peruggias. Po sipas mediave italiane, një prej punonjëseve të Pecorelli-t i ka rënë numrit të telefonit dhe zilja mësohet se ka rënë disa herë, por askush nuk është përgjigjur.
Hera e fundit që ai është futur në aplikacionin e komunikimit “WhatsApp” është data 6 Janar, në orën 16:12, që është edhe dita kur ai humbi gjurmët. Personi i parë që bëri denoncim për zhdukjen e Pecorellit, në komisariatin e Citta di Castello ishte ish-bashkëshortja e 45-vjeçarit, me të cilën ka 3 fëmijë. Në polici ajo deklaroi se Davide e telefononte çdo natë për të biseduar me fëmijët.
