Kryeministri Edi Rama në një dalje publike përmes Facebook-ut nga shtëpia e tij iu ka bërë thirrje sërish qytetarëve shqiptarë që të kufizojnë lëvizjet dhe të respektojnë distancën në mënyrë që të parandalohet koronavirusi.
Ai theksoi se koronavirusi nuk prek vetëm të moshuarit, por edhe të rinjtë bashkë me fëmijët.
Lidhur me faktin se koronavirusi prek të rinjtë dhe fëmijët, kryeministri i është referuar edhe profesorit të Universitetit të Kolumbias në SHBA, Stephe S. Morse.
Rama iu përgjigj edhe kritikave se përse nuk shkon në punë apo ka frikë nga koronavirusi. “Unë kam shkuar në zyrë kur më është dashur, por jo të tregohemi trima e të dalim vend e pa vend”, u shpreh Rama.
Edi Rama: Po bëjmë një gjë historike, por nuk duhet që disa të na e hedhin në koshin e plehrave për të rrezikuar në një tragjedi kombëtare në shifra të paimagjinueshme. Ky armik i verbër merr në botën tjetër jo vetëm ata që janë më të moshuar dhe më të dobëtit, por merr edhe ata që janë të shëndetshëm, të rinjtë, madje edhe fëmijët. Në Izrael një fëmijë i vogël është duke luftuar ndaj koronvirusit. Ndaj iu bëj thirrje të rinjve që të kufizojnë lëvizjet për të mos marrë me vete bombën që mund të vrasin ‘larg qoftë’ prindërit e tyre dhe ata vetë.