Gjatë orëve të fundit vendi ynë është përfshirë nga reshje të dendura shiut. Situate duket problematike në jug të vendit ku Lumi Vjosë përbën rrezik pasi në disa zona ka dalë nga shtrati duke përmbytur kryesisht tokë bujqësore. Gjithashtu problem mbetet edhe prurjet në Lumin Shkumbin. Kreu i grupit parlamentar i PS-së, Taulant Balla u ka bërë thirrje qytetarëve të Librazhdit që të marrin masa për të siguruar bagëtitë apo mjetet bujqësore. Me anë të një postimi në rrjete sociale, prurjet dhe reshjet e shiut do jenë të larta gjatë ditëve në vijim duke sjellë rritje të nivelit të Shkumbinit.
“Prurjet janë të larta dhe vijimi i reshjeve në Librazhd mund ta rrisë edhe më tej nivelin e Shkumbinit. Prandaj duhen larguar bagëtitë apo mjetet bujqësore nga tokat përgjatë lumit nga Çerma e sipërme dhe çermat e tjera përgjatë Shkumbinit”-shkruan Balla.
Moti i keq krijoi probleme edhe në Tiranë në bllokimin e përkohshëm të disa akseve rrugore, por edhe përmbytje të rrugëve, duke vështirësuar kalimin e këmbësorëve. Më qetë deri më tani paraqitet situate në veri të vendit, ku ndonëse reshjet kanë qenë të pranishme përgjatë gjithë ditës, nuk raportohet për dëme. Megjithatë duket se edhe në veri të vendit nëse reshjet vijojnë me intensitet do krijohen probleme me përmbytjet në zonën e Shkodrës, Lezhës dhe Kurbinit.