Ukraina ka patur mbështetje të pakushtëzuar nga Perëndimi, që nga fillimi i luftës, deri më tani që po bëhen gati 8 muaj.
Dje, madje mori të parin nga katër sistemet e mbrojtjes ajrore IRIS-T, të cilat Gjermania i kishte premtuar më parë.
Gjatë takimit virtual të liderëve të G7, Presidenti ukrainas Volodymyr Zelensky falënderoi kancelarin gjerman Olaf Scholz.
Sistemi i lëvizshëm Iris-T SLM, përbëhet nga tetë raketa tokë-ajër të montuara në kamion që mund të rrëzojnë aeroplanë ose raketa armike në një distancë deri në 40 kilometra dhe një lartësi prej gati 20 kilometrash.
Kancelari gjerman Scholz deklaroi se sistemet e drejtuara nga radarët, të dorëzuara me një çmim të vlerësuar prej 140 milionë euro për njësi, “do t’i mundësojnë Ukrainës të mbrojë qytete të tëra nga sulmet ajrore ruse”, raporton Jutarnji list.
Sulmet me raketa në Kiev dhe shumë qytete të tjera tregojnë qartë se sa e rëndësishme është dërgimi i shpejtë i sistemeve të mbrojtjes ajrore në Ukrainë”, tha Christine Lambrecht, Ministrja gjermane e Mbrojtjes.
Sulmet ruse me raketa dhe dronë terrorizojnë kryesisht popullsinë civile.
Përveç raketave të lundrimit, sistemi mund të synojë raketa balistike me rreze të shkurtër veprimi, si dhe avionë, helikopterë dhe drone. Koha e nevojshme për vendosjen e sistemit për shkrepje është 10 minuta dhe duhen 15 minuta për një karikim të ri. Raketat arrijnë një shpejtësi prej gati 3700 km/h.
