Një nga futbollistët më në formë te skuadra e Tiranës para ndërprerjes së kampionatit rej koronavirusit është padiskutim Agustin Torasa. Argjentinasi ishte duke kaluar një sezon shumë të mirë, duke dhënë asiste e shënuar gola të rëndësishëm për ekipin bardheblu.
Së fundmi në intervistë për mediat argjentinase, ai ka folur për eksperiencën e tij me skuadrat shqiptare dhe kampionatin e futbollit në vendin tonë.
“Jam këtu prej thuajse tre vitesh. Më parë kam luajtur për Partizanin dhe Flamurtarin. Sot janë edhe dy argjentinas të tjerë në një ekip tjetër të Superiores, por kam parë shumë argjentinas që kur kam ardhur këtu. Kampionati shqiptar është rritur shumë në vitet e fundit.
Ka gjithmonë e më shumë të huaj dhe niveli është përmirësuar. Ky është një futboll mjaft fizik në përgjithësi. Dy klubet me të mëdhenj, për histori dhe numër tifozësh janë Partizani dhe Tirana, ky është i vetmi derbi në vend. Paraqitja ime aktuale është e mirë, me 4 gola në 18 ndeshje. Jemi në majën e klasifikimit me 9 pikë diferencë nga Kukësi dhe mbeten 10 ndeshje deri në fund”,-tha ai.
Më tej lojtari i Tiranës u tha atyre seedhe nëse skuadra e tij ka humbur një ndeshje, mund të dalë në rrugë normalisht dhe mund të pijë birra si një person normal.
“Me raste të mungon pak çmenduria e futbollit argjentinas, por edhe këtu të kënaq. Këtu jetoj shumë I qetë, qyteti është i bukur, njerëzit janë shumë miqësorë. Nëse humb një ndeshje, mund të dal në rrugë, të darkoj jashtë dhe të pi një birrë si një person normal”,-tha ndër të tjera Torasa./Fjala.al/
